虽然微软个Win 10升级工具好快自己消失，但佢一日未落架，一日仍然可以发挥佢嘅神级滋扰功能。最新消息係佢已经昇华到新境界，你以为揿交叉等于拒绝升级关闭视窗，事实正正相反，揿交叉係同意升级至啱。

本周唔少用户反映微软更新咗升级工具「Get Windows 10」（下称GWX），界面无明确指示延迟升级选项，右下角只得「即时更新」同「OK」两个掣。由于旧GWX揿交叉就係取消升级，大批人习惯使然无多加思考直接关闭，结果时辰一到部机自己变成Win 10，实际上真延迟掣去咗'Click here to change upgrade schedule or cancel scheduled upgrade.'个'here'到。

庆幸微软提供亡羊补牢方案，喺预定升级时间前15分钟，电脑将显示倒数时计，呢个时候你可以选择'I need more time'拖延升级。问题係电脑有时处于閑置状态，用家唔喺机前咪救唔返？微软话桌面工具列会有升级时间提示，用户可把握机会重新计划时间或取消，之不过同样道理，提示显示时间不明，佢弹出嚟你未必喺电脑前面。担惊受怕到呢个地步的话，你可以选择隐藏GWX，或者用第三方工具强行制止程式运作。

◆ 瞪大眼睇清楚，"here"係掣嚟
◆ 错过第一次，可以去工具列右下角popup解决
◆ 都係错过的话，遇到死亡倒数仲可以拣"I need more time"
◆ 呢个咁明显，要拣边个唔使教喇
◆ 记住係揿项细字，唔好移去右上角